eGov арқылы ЖК тіркеу кезінде банк шот ашудан бас тарта алады

Әділет министрлігі "Заңды тұлғаларды және олардың филиалдарын мемлекеттік тіркеу жөніндегі мемлекеттік қызмет көрсету ережелеріне" өзгерістер енгізді. Өзгерістер электрондық үкімет порталы арқылы кәсіпкерлікті тіркеу кезінде банктерге шот ашудан бас тарту құқығын береді. 2020 жылғы 29 мамырдағы №66 Әділет министрінің бұйрығына сәйкес, шағын және орта бизнес субъектілері үшін заңды тұлғаны мемлекеттік тіркеу кезінде eGov порталында тіркеу өтінішімен қатар міндетті түрде банк шотын ашуға электронды өтініш берілуі тиіс. Сондай-ақ, егер құрылтайшылар жалдамалы қызметкерлерді тартуды жоспарласа, қызметкердің жансақтау оқиғаларынан міндетті сақтандыру өтінішін рәсімдеу қажет. Сонымен бірге, Ережеге алғаш рет банк операцияларының кейбір түрлерін жүзеге асыратын екінші деңгейдегі банктер мен ұйымдарға "Төлемдер және төлем жүйелері туралы" Заңда көрсетілген жағдайларда банк шотын ашудан бас тарту құқығы енгізілді. Айта кету керек, банктердің шот ашудан бас тарту құқығы жаңа құқық емес. Ол қазіргі заңнамаларда қарастырылған. Клиенттердің банк шоттарын ашу, жүргізу және жабу ережелеріне сәйкес, банк салық кодексінде, "Табыстарды заңдастыруға (қаржыны жылыстатуға) және терроризмді қаржыландыруға қарсы" Заңда, "Төлемдер және төлем жүйелері туралы" Заңда белгіленген негіздер бойынша, қажетті құжаттар ұсынылмаған жағдайда немесе банк қызметі шарты жасалмаған жағдайда шот ашудан бас тарта алады. Осылайша, енгізілген өзгерістер бұл норманы тікелей электрондық үкімет порталы арқылы кәсіпкерлік тіркеу ережелерінде бекітеді және заңды тұлғаны тіркеу кезінде шот ашуда өтініш беруші мен банк арасындағы өзара іс-қимыл тәртібін нақтылайды.